निंबाळकरांविरोधात अंधारेंचा फलटणमध्ये आरोपांचा दरबार, पोलीस स्टेशनमध्येच ठिय्या,
एक नजर महाराष्ट्र न्युज फलटण : येथील डॉक्टर संपदा मुंडे यांच्या मृत्यू प्रकरणाची सध्या एसआयटीमार्फत चौकशी सुरू आहे. मात्र, ठाकरे गटाच्या नेत्या सुषमा अंधारेंनी या चौकशीवर अविश्वास दर्शवत फलटण पोलीस ठाण्याबाहेर ठिय्या आंदोलन केले. त्यांनी पोलीस खात्याऐवजी न्यायमूर्तींद्वारे चौकशी करण्याची मागणी केली. पोलीस खात्यावर विश्वास नसल्याने, उच्च न्यायालयाची उच्चस्तरीय समिती नेमावी, अशी त्यांची मागणी होती. मागणी पूर्ण न झाल्यास मुंबईतील मंत्रालयही जाम करण्याचा इशारा त्यांनी दिला.
या प्रकरणात स्थानिक भाजप नेते आणि माजी खासदार रणजितसिंह निंबाळकर यांच्यावरही आरोप झाले आहेत. मंत्री जयकुमार गोरे आणि महिला आयोगाच्या अध्यक्षा रूपाली चाकणकर यांनी मृत संपदा मुंडे यांच्या मोबाईलमधील चॅटिंगवरून धक्कादायक माहिती उघड केली. लक्ष्मीपूजनाच्या दिवशी प्रशांत बनकर यांच्या घरी फोटो काढण्यावरून वाद झाल्याचे चाकणकर यांनी सांगितले.
यानंतर संपदा यांनी आत्महत्येची धमकी दिल्याचे प्रशांत बनकर यांनी म्हटले. मात्र, अंधारेंनी तपास सुरू असताना गोरे आणि चाकणकर डॉक्टर संपदा यांची बदनामी करत असल्याचा आरोप करत त्यांच्या वक्तव्यांवर संताप व्यक्त केला. संपदा मुंडे यांच्या हातावरील सुसाईड नोट आणि शवविच्छेदन अहवालावर त्यांच्या कुटुंबीयांनीही शंका उपस्थित केली आहे.
